ಕಾಲೇಜು ಪ್ರಾರಂಭವಾದಂದಿನಿಂದ ಇಂದಿನವರೆಗೂ ಕನ್ನಡ ವಿಭಾಗವು ಶೈಕ್ಷಣಿಕ, ಸಾಹಿತ್ಯ ಹಾಗೂ ಸಾಂಸ್ಕೃತಿಕ ಚಟುವಟಿಕೆಗಳ ಕೇಂದ್ರಬಿಂದುವಾಗಿ ಕಾಲೇಜಿನ ಒಂದು ಪ್ರಮುಖ ವಿಭಾಗವಾಗಿ ಬೆಳೆದು ಬಂದಿದೆ. ಭಾಷಾ ಕಲಿಕೆಯೊಂದಿಗೆ ಕನ್ನಡ ಐಚ್ಛಿಕ ವಿಷಯವನ್ನು ವಿದ್ಯಾರ್ಥಿನಿಯರು ಶಿಸ್ತುಬದ್ಧ ಅಧ್ಯಯನವಾಗಿ ಇಲ್ಲಿ ಕಲಿಯುತ್ತಿದ್ದಾರೆ. ಭಾಷಾಪ್ರೇಮ, ಸಂವಹನ ಕೌಶಲ, ಬರವಣಿಗೆಯ ಸಾಮರ್ಥ್ಯ, ಭಾಷಾಶುದ್ಧತೆ ಹಾಗೂ ಸ್ಪರ್ಧಾತ್ಮಕ ಪರೀಕ್ಷಾ ತಯಾರಿಕೆಯ ಜೊತೆಗೆ ವಿದ್ಯಾರ್ಥಿನಿಯರಲ್ಲಿ ಸುಪ್ತವಾಗಿರುವ ಕಲಾಪ್ರತಿಭೆಯ ಅನಾವರಣಕ್ಕೆ ವೇದಿಕೆಯನ್ನು ಒದಗಿಸುವ ಮೂಲಕ ಅವರಲ್ಲಿನ ಸಾಹಿತ್ಯ, ಸಂಗೀತ, ಚಿತ್ರಕಲೆ, ಭರತನಾಟ್ಯ, ಜನಪದ ನೃತ್ಯ ಮುಂತಾದ ಲಲಿತಕಲೆಗಳಿಗೆ ಉತ್ತೇಜನ ನೀಡುತ್ತಾ ಬಂದಿದೆ. ಭಾಷಾಂತರ ಕಾರ್ಯಾಗಾರ, ಸಂವಾದ ಗೋಷ್ಠಿ, ವಿಚಾರ ಸಂಕಿರಣ ಮತ್ತು ಯುವ ಕವಿಗೋಷ್ಠಿಯನ್ನು ಏರ್ಪಡಿಸುತ್ತಿದ್ದೇವೆ. ಪ್ರತಿ ವರ್ಷ ನಾಡು, ನುಡಿಯ ಸಂಭ್ರಮಾಚರಣೆಯ ಪ್ರತೀಕವಾಗಿ ‘ಕನ್ನಡ ಕಂಪು’ ಎಂಬ ಸಾಂಸ್ಕೃತಿಕ ಸೌರಭವನ್ನು ಹೊರಸೂಸುವ ನುಡಿಹಬ್ಬವನ್ನು ಆಚರಿಸಿಕೊಂಡು ಬರಲಾಗುತ್ತಿದೆ. ಈ ಹಿಂದಿನ ಕನ್ನಡ ವಿಭಾಗದ ಮುಖ್ಯಸ್ಥರಾಗಿದ್ದ ಪ್ರೊ. ಜಗದಾಂಬ ಮಲ್ಲೇದೇವರು, ಪ್ರೊ. ಎ.ಎಸ್. ಜಯರಾಂ, ಪ್ರೊ. ಎಂ.ಜಿ. ರೇಣುಕಾಪ್ರಸನ್ನ, ಪ್ರೊ. ಬಿ. ಸೋಮಶೇಖರಪ್ಪ, ಪ್ರೊ. ಕೆ.ಪಿ. ಮಹಾದೇವಪ್ಪ, ಪ್ರೊ. ಗುರುಮಲ್ಲಪ್ಪ, ಪ್ರೊ. ವೀರಣ್ಣ, ಡಾ. ಎಸ್.ಪಿ. ಉಮಾದೇವಿ ಹಾಗೂ ಇತರೆ ಪ್ರಾಧ್ಯಾಪಕರು ವಿಭಾಗದ ಶ್ರೇಯೋಭಿವೃದ್ಧಿಗೆ ಪ್ರಾಮಾಣಿಕ ಸೇವೆಯನ್ನು ಸಲ್ಲಿಸುವ ಮೂಲಕ ಕಾಲೇಜಿನ ಘನತೆಯನ್ನು ಎತ್ತಿ ಹಿಡಿದಿದ್ದಾರೆ. ಕಾಲೇಜು ಸ್ವಾಯತ್ತತೆಯನ್ನು ಹೊಂದಿದ ನಂತರ ವಿಭಾಗ ತನ್ನದೇ ಆದ ಪ್ರತ್ಯೇಕ ಅಧ್ಯಯನ ಹಾಗೂ ಪರೀಕ್ಷಾ ಮಂಡಳಿಯನ್ನು ಹೊಂದಿದ್ದು ಬೋಧನೆಯಲ್ಲಿ ಸಾಹಿತ್ಯದ ವಿವಿಧ ಪ್ರಕಾರಗಳನ್ನು ಪಠ್ಯಕ್ರಮದಲ್ಲಿ ಅಳವಡಿಸಿಕೊಂಡು ಬಂದಿದೆ.